Untitled

I love you like the ripples that form in your coffee when you blow on it; like wind and waves, always moving in the same direction.
I love you as if this is the first time I've loved; like I was meant to fall as a raindrop falls straight to the ground.
I love you like unfinished or incomplete sentences, like misplaced punctuations or inappropriate pronouns.
I love you along with the existential perplexities of our youth, the questions and answers to life.
In a parallel universe, in another lifetime, I am still yours. I will love you for as long as I can.

05/08

Mga Tulang Walang Pamagat at Hindi ko Sinulat 4.0

Di mapigil ang luhang laan,
Pagkat ikaw ay di matantanan.
Sa gabing walang alam kundi pait,
Alaala mo ang tanging gumuguhit.
Sa liwanag na pinagkakait,
Hiling ng puso'y isusulit.
Makabalik sana sa oras ng tagpuan,
At tiyak na di ka pakakawalan.
Kaysa sa pagitan ng oras na bilang.
Masakit man ay makasama ka lamang.

March 20 12:46am

(DRA)

Mga Tulang Walang Pamagat at Hindi ko Sinulat 3.0

Alas singko, bumangon ang isip,
Kunyari ay puno ng ligalig.
Alas sais nang umalis,
Iisa ang alam na nais.

Alas siyete sumabay sa kampana,
Paghihintay di na alintana.
Alas otso nagsimulang dumungaw,
Pinipigilan ang sarili na humiyaw.

Alas nuebe na ngunit walang masabi,
Tanging alok isang tasang kape.
Mga unang bigkas sapit nang alas diyes,
Tanging hiling ay walang umalis.

Alas onse nang tuluyang sumuway,
Tila mga alon ng dagat na walang humpay.
Ayaw paawat kahit alas dose,
Ikaw lang, kahit walang umuwi.

Ala una nang tamaan,
Sitwasyon na kay hirap takasan.
Ngunit ayaw patinag kahit alas dos,
Walang ibang iniisip pano ilulubos.

Sa alas tres pinupuno ng ngiti,
Ang alaalang baon pauwi.
Alas kwatro nang iwaksi ang oras,
Nagkukunwaring di na ito lilipas.

Heto't pumatak ang alas singko,
Tanong sa sarili kung lilisan nako.
Ayaw bumitaw na tila walang bukas,
Patuloy mong hagkan nang di makaalpas.

Alas singko nang bumagsak ang araw,
Hihiling na sana bukas, sana lagi, ikaw.

-March 18, 6pm

(DRA)

Mga Tulang Walang Pamagat at Hindi ko Sinulat 2.0

Madalas nais na lamang kalimutan,
Pagtatagpong pinagmulan.
Sabi sa sarili'y di na lilingon,
Ngunit heto ang puso'y hinahamon.

Bakit patuloy na lumalapit?
At isip sinusubukan ipihit?
Bakit pinipigilan matapos ang araw?
At sinusulit ang bawat tanaw?

Bakit ang gabi'y mabagal lumipas?
At mga tala'y nais kunin sa taas?
Bakit ang diwa'y laging wala?
At nahahanap na nasa iyong tabi pala?

Bakit tuloy ang dungaw sa kawalan?
At nagbabaka sakaling masulyapan?
Bakit tulala't naglalayag sa hangin?
At sa gunita ikaw ay akin?

Bakit walang humpay ang tanong?
Ngunit di malaman kailan susulong?
Tunay nga bang pahihirapan?
Nang damdamin na gustong suklian?

- March 18 12:11pm

(DRA)

Mga Tulang Walang Pamagat at Hindi ko Sinulat 1.0

Ang liwanag na tagos sa salamin,
Di mapigil lubos aminin.
Hinihintay ang muling pagsilip,
Nang pagkakataong ika'y mahagip.

Binibilang mga hakbang mula sayo,
Nagtatanong saan itutungo.
Kumpas ng ngiti tanging kailangan,
Wala mang sagot na umabot sa katanungan.

Mga kamay ay patuloy nanlalamig,
Pilit inaabot pagkat iyo ang ibig.
Mga talang nangingibabaw sa langit,
Kapantay ay damdaming nagngingitngit.

Mga salita sa bibig ay di mawari,
Di mahalaga hangga't ika'y mananatili.
Sa bawat dampi ng hangin sa pisngi,
Eto ako magaabang lagi't nakangiti.

Halakhak mo'y tuluyang lumamon sa paligid,
Tanging ikaw at ako ang nasa silid.
Tagos ang bawat minuto ng sandali,
Ayaw paawat, ayaw nang umuwi.

Kailanma'y di na yata magiging handa,
Sa sunod mong bisita ako'y suko na.
Ikaw, ako, at ang pagsapit ng dilim,
Di matatapos, patuloy na lalalim.

-March 12 1:15am

(DRA)