muli

Habang binabasa ko ang mga naitago kong kopya ng mga pag-uusap natin

Muling naglaro sa aking isipan ang mga gabing hinangad kong hindi na matapos

Katulad ng mga kwentuhan natin dati na napanis na ng mga bagong alaala

Mga kwentuhang iginuhit natin sa likod ng ating pag-iisa

Magkasamang nag-iisa.

Naalala mo pa  ba nung sinabi mo sa aking nanghihinayang ka

Sa pagkakataong sayo na lumapit pero nakuha pa ng iba

Wala akong nasabi dahil sa pagkakataong iyon, nahulog na ko

Sa balon ng pag-aakala at panaginip

At sabay nating nilunod ang ating mga sarili sa mga baka sakali at sana.

Subalit mas malalim ang pagkakalubog ko at tinangka ko pang sagipin ka

Unti-unti kang nakaahon, nakabangon habang ako’y naiwang nagtatanong,

Ano nga ba ang silbi ng mga panaginip kung gigisingin ka din naman ng realidad?

Para saan ang mga pangarap kung mananatili din lamang itong mga pangarap?

At sabay nating hinanap ang mga kasagutan sa mga bote ng alak

At mga pakete ng sigarilyo hanggang sa ibalik ng umaga ang ating mga katinuan.

Sa bawat hagod ng mga alak na iyon sa aking lalamunan ay ang pagsalo ko

Sa bawat patak ng pag-asa...

Pag-asa na para sa’yo ay nawala at nasayang,

Pag-asa na para sa akin, sa’yo ko natagpuan.

At kasabay ng paghithit mo sa yosing kasing ikli na ng panahong natitira,

Unti-unti ding nalululong ang tiwalang minsan mong nahanap sa akin.

Hindi naman talaga bulag ang pag-ibig, at lalong hindi din bulag ang mga umiibig

Ang katotohanan ay nagkukubli sa likod ng mga kamalian

Mga kamaliang nakikita ngunit hindi nagiging mahalaga

Mga kakulangan pinupunan ng mga pusong umiibig at umaasa.

Alam mong hindi kita hinanap, dumating ka lamang

Dumating at nanatili sa tabi ko noong ako ay naghihintay

Hindi na ko babalik, at malapit ka na ring umalis...

Ang tanging naiwan ay ang pader na binuo ng katahimikan sa pagitan nating dalawa

Sa mga muling paghaharap na nauuwi sa pag-iwas.

Sana ay itigil na natin ito.

At sana ay maging mailap ang mga pagkakataon para tayo ay muling magkita,

Sana matagal pa...

Sana sa pagkakataong hindi inaasahan at maaalala lamang natin

Ang mga araw at gabing nilamon tayo ng ating pagkabata.

At maalala na lang natin na minsan tayong naging masaya.

Balang araw...Ikaw.Ako. Mas masaya, sa susunod nating pagkikita.